KB Peja këtë javë, saktësisht të mërkurën nis përgatitjet për sezonin e ri, ka njoftuar të hënën klubi i Superligës së Kosovës në basketboll.
Në njoftimin e klubit, thuhet se tashmë gjithçka është gati që ekipi të zbresë në parket për t’u përgatitur sa më mirë për sezonin 2026/27.
“Nesër pritet të arrijnë në Pejë trajneri Michalis Kakiouzis dhe pjesa e lojtarëve, duke i dhënë fund fazës së organizimit dhe duke nisur kapitullin e punës së përbashkët”, thuhet në njoftimin e Pejës.
Po ashtu, Peja ka bërë të ditur se në kuadër të përgatitjeve ka aranzhuar vetëm pesë ndeshje miqësore, të cilat do ti shërbejnë ekipit për të ndërtuar formën fizike dhe për të testuar sistemin e lojës.
Krahas vendorëve si Arti Hajdari, Altin Morina, Dion Haxhosaj e Jetmir Zeqiri, KB Peja ka angazhuar edhe katër lojtarë amerikan.
Gjithashtu, muajin tjetër, Peja do të përballet me Dinamon e Bukureshtit në kuadër të kualifikimeve për FIBA Europe Cup.
