Shtetet e Bashkuara të Amerikës do të dërgojnë trupa nga Regjimenti i 2-të i Kalorësisë dhe njësi mbështetëse nga Divizioni i Parë i Këmbësorisë në Kosovë, në kuadër të misionit paqeruajtës të NATO-s, KFOR, për të zëvendësuar trupat amerikane që aktualisht janë të angazhuara në vend.
Sipas njoftimit të Ushtrisë Amerikane në Evropë dhe Afrikë, rotacioni përfshin zëvendësimin e Grupit Luftarak të Brigadës së 53-të të Këmbësorisë së Gardës Kombëtare të Floridës, si dhe të Batalionit të 2-të të Regjimentit të 135-të të Aviacionit të Gardës Kombëtare të Kolorados nga pjesëtarë të Brigadës së Aviacionit Luftarak të Divizionit të Parë të Këmbësorisë.
Ky ndryshim vjen pas një rishikimi nga Shtabi i Lartë i Fuqive Aleate në Evropë (SHAPE) dhe, sipas autoriteteve amerikane, synon të mbështesë optimizimin e misionit të KFOR-it, duke marrë parasysh zhvillimet e sigurisë në terren.
Në njoftim theksohet se ndryshimi pasqyron përmirësimin e kushteve të sigurisë dhe mbështet një qasje graduale, të bazuar në rrethanat në terren, në mënyrë që KFOR-i të vazhdojë të jetë i pozicionuar për përmbushjen e mandatit të tij.
Po ashtu, ky rotacion shënon një ndryshim në mënyrën e angazhimit të forcave amerikane në Kosovë, me kalimin nga trupat e Gardës Kombëtare te njësitë e angazhuara përmes strukturave ushtarake për operacionet jashtë vendit.
Koloneli Samuel Sargent ka vlerësuar angazhimin e trupave amerikane gjatë misionit në Kosovë, duke theksuar bashkëpunimin me aleatët dhe partnerët e NATO-s.
“Shërbimi përkrah aleatëve dhe partnerëve tanë të NATO-s në Kosovë ka qenë një nder për ushtarët tanë. Grupi Luftarak i Brigadës së 53-të të Këmbësorisë mbetet krenar për profesionalizmin dhe përkushtimin që trupat tona kanë dëshmuar gjatë këtij misioni”, ka deklaruar Sargent.
Ai ka shprehur bindjen se njësia e re do të vazhdojë përpjekjet për ruajtjen e sigurisë në vend.
“Jemi të bindur se njësia që do të vijë do të vazhdojë t’i forcojë përpjekjet e KFOR-it për të ruajtur një mjedis të sigurt dhe të mbrojtur për të gjitha komunitetet”, ka shtuar ai.
Ndërkaq, koloneli Jabari M. Miller, zëvendësshef i mirëmbajtjes në Divizionin e Parë të Blinduar dhe komandant i ardhshëm i Komandës Rajonale – Lindje, ka theksuar gatishmërinë e trupave që do të angazhohen në Kosovë.
“Divizioni i Parë i Këmbësorisë, së bashku me kolegët tanë nga Regjimenti i 2-të i Kalorësisë, e konsiderojnë nder marrjen sërish përsipër të këtij misioni jetik. Ushtarët tanë janë në formë të mirë fizike, të motivuar, të disiplinuar, të trajnuar dhe të gatshëm të punojnë përkrah aleatëve dhe partnerëve tanë të NATO-s për të ruajtur një mjedis të sigurt dhe të mbrojtur në Kosovë”, ka deklaruar Miller.
Ai ka falënderuar gjithashtu trupat që po përfundojnë rotacionin e tyre për kontributin në misionin paqeruajtës.
“E falënderojmë Grupin Luftarak të Brigadës së 53-të të Këmbësorisë për shërbimin e tij të jashtëzakonshëm dhe mbetemi të përkushtuar për të siguruar mbështetje të vazhdueshme për misionin e KFOR-it”, ka thënë Miller.
Në fund të njoftimit, autoritetet amerikane kanë riafirmuar përkushtimin e SHBA-së për paqen dhe stabilitetin në Ballkanin Perëndimor, duke theksuar se bashkërendimi me NATO-n dhe partnerët do të vazhdojë gjatë gjithë procesit të rotacionit.
Trupat amerikane do të vazhdojnë të veprojnë në kuadër të KFOR-it, në përputhje me Rezolutën 1244 të Këshillit të Sigurimit të Kombeve të Bashkuara, me synimin për të kontribuar në ruajtjen e një mjedisi të sigurt dhe të mbrojtur për të gjitha komunitetet në Kosovë.
