Kryeministri në detyrë, Albin Kurti, ka mbërritur në Kuvendin e Kosovës, ku po zhvillon takimin e paralajmëruar me kryetarin e Lidhjes Demokratike të Kosovës, Lumir Abdixhiku.
Kurti në takim është shoqëruar nga ministri në detyrë i Financave, Hekuran Murati. Nga ana e LDK-së po marrin pjesë Lumir Abdixhiku, nënkryetari i partisë, Lutfi Haziri, si dhe ish-presidentja Vjosa Osmani.
Para nisjes së takimit, Kurti deklaroi se Lëvizja Vetëvendosje i ka votat e nevojshme për formimin e qeverisë, por theksoi se zgjedhja e presidentit kërkon bashkëpunim edhe me opozitën.
“Ne kemi mbështetje të mjaftueshme sa i përket Kuvendit dhe formimit të qeverisë. Mirëpo, për zgjedhjen e presidentit nuk ka përgjegjësi vetëm mazhoranca, por edhe opozita. Kushtetuta e sheh presidentin si shprehje të unitetit të popullit, prandaj në këtë proces duhet të bashkëpunojnë edhe qeveria, edhe opozita”, u shpreh Kurti.
Takimi mes Kurtit dhe Abdixhikut po zhvillohet në kuadër të konsultimeve që kryeministri në detyrë ka nisur me partitë politike para vazhdimit të seancës konstituive të Kuvendit të Kosovës.
Pas përfundimit të takimit, pritet që Kurti dhe Abdixhiku të mbajnë deklarata për mediat.
