Janë shenja që sinjalizojnë, një zonë krimi.
Ato janë të shpeshta në rrugën që të shpie në fshatin Kalludër e Vogël.
Ato të dërgojnë në thellësi të fshatit, aty ku është lokalizuar edhe vendi i krimit.
Për të shkuar te vendi ku dyshohet se ka gjurmë të krimeve të kryera afro 3 dekada më parë, tereni është jo i lehtë.
Tash e një javë, kjo rrugë po përshkohet nga njësitet policore, të Institutit të Mjekësisë Ligjore dhe ekspertë të EULEX-it.
Kjo në vazhdën e kërkimeve në varrezën masive.
Për ecurinë e këtyre gërmimeve ka reaguar edhe kryeprokurori i shtetit.
“Kryeprokurori i Shtetit vlerëson lart punën profesionale, përkushtimin dhe angazhimin e të gjitha institucioneve ligjzbatuese të Republikës së Kosovës, të cilat janë të përfshira në rastin e zbulimit të varrezave masive në komunën e Zubin Potokut, ku janë gjetur mbetje mortore dhe dyshohet se ka trupa tjerë të viktimave që i përkasin luftës së fundit në Kosovë”, kanë njoftuar nga Prokuroria.
Gjatë javës së kaluar, gërmimet u vizituan edhe nga krerët institucionalë.
