Një person ka humbur jetën si pasojë e një aksidenti të rëndë trafiku që ka ndodhur në orët e para të mëngjesit të së premtes në rrugën nacionale Prishtinë–Pejë, në fshatin Vragoli.
Sipas Policisë së Kosovës, aksidenti ka ndodhur rreth orës 03:00, ku një veturë me drejtues të dyshuar mashkull kosovar ka goditur një këmbësor.
Zëdhënësja e Policisë së Kosovës, Luljeta Mehmeti, ka bërë të ditur se ekipet mjekësore kanë dalë në vendin e ngjarjes dhe kanë konstatuar vdekjen e viktimës.
“Me datën 24.07.2026, rreth orës 03:00 të mëngjesit, në rrugën nacionale Prishtinë–Pejë, në fshatin Vragoli, ka ndodhur një aksident trafiku me fatalitet, ku një veturë me drejtues të dyshuar mashkull kosovar ka goditur një person, këmbësor të gjinisë mashkullore”, ka deklaruar Mehmeti.
Ajo ka njoftuar se nga aksidenti kanë pësuar lëndime edhe drejtuesi i automjetit dhe një pasagjer.
“Në vendngjarje kanë dalë të gjitha njësitë relevante, përfshirë ato mjekësore, të cilat kanë konfirmuar vdekjen e viktimës. Si pasojë e aksidentit, lëndime kanë marrë edhe vozitësi i veturës dhe një pasagjer”, ka thënë Mehmeti.
Për rastin është njoftuar prokurori kompetent, ndërsa njësitet policore kanë nisur hetimet për zbardhjen e plotë të rrethanave të aksidentit.
Trupi i pajetë i viktimës është dërguar për obduksion.
