Edhe 16 ditë mbaron afati kushtetues për konstituimin e Kuvendit.
Për këtë çështje, ushtruesja e detyrës së Presidentes, Albulena Haxhiu, tregoi sot se të premten do të njoftoj se kur do të mbahet seanca.
“Ajo do të bëhet në javën e parë të muajit gusht, edhe të premten, besoj, do ta bëj një njoftimin se kur saktësisht do të mbahet kjo seancë”, tha Haxhiu.
Por një përgjigje për seancën nuk e pati gjatë ditës kryeministri në detyrë, Albin Kurti.
I pyetur nga gazetarët se a është në pritje të Lidhjes Demokratike të Kosovës për të rinisur bisedimet për formimin e institucionet, Kurti zgjodhi të mos përgjigjej.
Koalicionin Vetëvendosje – LDK, e sheh si më të përafërtin edhe profesori Avdi Smajljaj.
Megjithatë, sipas tij edhe në rast të një marrëveshjeje, sërish do të mungojnë votat për Presidentin.
“Si mundësi më e madhe ose më e pritshme është VV-LDK, në bazë të deklaratave pas atij takimit të gjatë që ishte rreth dy orë e gjys tani në mes binomit të LDK-së dhe përfaqësuesve të Vetëvendosjes, nga ai takim u pa që është ndoshta një mundësi, megjithatë zhvillimet e brendshme brenda LDK-së, mbledhja e nënshkrimit për shkarkimin e kryetarit i ulin shanset për një marrëveshje të tillë, shto këtu edhe faktin që edhe nëse arrihet një marrëveshje pa konsensus të brendshëm të LDK-së, LDK-ja nuk i ka të gjitha votat e veta në Kuvend dhe do të pamundësonte zgjedhjen e presidentit”, shprehet Smajljaj.
7 gushti është dita e fundit deri kur mund të thirret seanca për konstituimin e Kuvendit të Kosovës.
