Puna e një viti i shkoi huq brenda disa minutash.
Reshjet e mëdha të shiut të hënën, këtij fermeri në Kovragë të Istogut i shkaktuan dëme të mëdha.
Afrim Salihu thotë se mjaftuan pesë minuta, që breshëri t’ia shkatërrojë të gjitha të mbjellurat.
“Dy hektarë e gjysmë i kemi mollë e kumbulla, dëmi është i paparashikueshëm…unë nuk kam parë asnjëherë, breshër ka ra por jo me këtë sasi e me këtë erë që ka ekzistu. Kjo ka qenë sikur tajfun, por çkado që vjen prej Zotit, njeriu po u dashka me u pajtu”, ka thënë Salihu.
Salihu thotë se dëmi i një dite më parë, bën që as vitin e ardhshëm të mos ketë më fryte.
Për këtë, 64-vjeçari kërkon ndihmë nga Qeveria.
“Mos me i këqyr vetëm bujqit që kanë hektarë shumë, po me i ndihmua çdo bujku si ai që e ka një hektar, si ai 20/30 ari, se edhe atij i është bërë dëme. Kisha apeluar që me qenë gjithë të barabartë e Ministria me qenë me të gjithë bujqit e fshatit Kovragë e barabartë”, ka thënë tutje Salihu.
Të njëjtën kërkesë kanë edhe këta bujq.
Këtë ia shpalosën ministrit në detyrë të Bujqësisë, Armend Muja, i cili këtë të martë qëndroi në Kovragë.
“Presim me na ndihmu, se më herët edhe kur binte breshër diçka shpëtonte, por për këtë vit ka përfunduar çdo sen”, u shpreh Gjoci.
E dikush tjetër, u tregua edhe më i ashpër.
“Po betohem se nëse kemi fatkeqësi viteve tjera, këtu asnjë zyrtar nuk ka me shkel këtë tokë më, fjalë nuk dua, dua përkrahje”, ka thënë një bujk.
Por që kjo të ndodh, sipas ministrit në detyrë të Bujqësisë, Armend Muja, fillimisht duhet të vlerësohen dëmet.
“Hapi i parë që kërkohet është nga komuna që ta themelojë Komisionin për Vlerësimin e Dëmeve….ne kërkojmë që kjo të bëhet në afatin më të shkurtër…ai raport kur të kompletohet, i njëjti duhet t’i dërgohet Agjencisë për Menaxhim të Emergjencave dhe Agjencia në bazë të Ligjit për Mbrojtje nga Fatkeqësitë Natyrore e adreson atë te qeverisja qendrore”, u shpreh Muja.
“Besoj që brenda shtatë ditëve kalendarike ne e përfundojmë raportin e vlerësimit i cili del para kuvendit dhe menjëherë i drejtohet Ministrisë së Bujqësisë dhe Agjencisë për Menaxhim të Emergjencave. Mua më gëzon fakti që ka gjetur kohë ministri, mirëpo çka nuk po më gëzon është që nuk po mbërrijmë që të marrim një zotim konkret edhe në pyetjet e gazetarëve edhe timen me i ditur këta fermerë dhe këta bujq se të vetmen të ardhur e kanë bujqësinë, a ka me ju kompensuar ndonjë përqindje e dëmit, qoftë ajo edhe 5%, qoftë 10%, pavarësisht prej kapaciteteve financiare, unë e di se Qeveria e Kosovës ka të planifikuara në linjë buxhetore përmes Ministrisë së Financave fond buxhetor për reagim në situata të fatkeqësive natyrore”, theksoj Ferati.
Ndërsa nga Ministria e Bujqësisë u bë e ditur se nga java tjetër do t’i propozojnë masat se në çfarë forme mund t’i ndihmojnë të gjithë këta fermerë të dëmtuar.
