Drejtori i Global Crisis Group, Ilir Kulla, ka deklaruar se garancitë ndërkombëtare nuk janë të mjaftueshme nëse një shtet nuk ka kapacitete të veta mbrojtëse.
Në emisionin “Matrix” në Tëvë1, të moderuar nga Mehmet Kalisi, Kulla tha se Kosova duhet të investojë më shumë në mbrojtje dhe ta shohë përvojën e Ukrainës si një mësim.
“Kur garancitë ndërkombëtare nuk kanë trupa në terren, nuk vlejnë. Edhe për Kosovën e kemi përmendur se duhet të ketë të paktën një miliard euro buxhet dhe një ushtri të mirëfilltë. Pa kapacitet real në terren nuk vlen. Kosova duhet të vërë mend nga ajo që ndodhi në Ukrainë. Ukraina në vitin 1994 hoqi dorë nga armët bërthamore pasi mori garanci ndërkombëtare për mbrojtje, por më pas u sulmua dhe u pushtua”, ka deklaruar Kulla.
I pyetur nëse, pas përfundimit të luftës në Ukrainë, Serbia mund ta zhvendosë fokusin drejt Kosovës dhe të krijojë tensione të reja në rajon, Kulla u shpreh se nuk e sheh një skenar të tillë si të mundshëm.
Sipas tij, orientimi gjeopolitik i Kosovës tashmë është i qartë dhe Serbia nuk ka interes të përballet në mënyrë të drejtpërdrejtë me Perëndimin.
“Unë mendoj se marrëveshja e bërë ndërmjet presidentëve Trump dhe Putin e ka vendosur përfundimisht Kosovën dhe rajonin në kampin perëndimor. Serbia nuk ka vepruar me mençuri nëse do të vazhdonte një përballje me Perëndimin. Nëse do t’i jepej një mundësi, do të tentonte, por nuk besoj se ka gjasa që kjo të ndodhë”, ka thënë Kulla.
