Dy vetura janë përfshirë nga zjarri në fshatin Begaj të Vushtrrisë, në një incident që po hetohet nga Policia e Kosovës.
Sipas raportit 24-orësh të Policisë, rasti është raportuar nga pronari i automjeteve, i cili ka njoftuar se gjatë ditës së djeshme dy veturat e tij, me targa vendore, kanë marrë flakë derisa ishin të parkuara para shtëpisë.
Menjëherë pas pranimit të njoftimit, në vendin e ngjarjes kanë dalë njësitë përkatëse të Policisë së Kosovës, si dhe ekipet e zjarrfikësve, të cilët kanë ndërhyrë për lokalizimin dhe shuarjen e zjarrit.
Në raportin policor thuhet:
“Në konsultim me prokurorin është iniciuar rasti dhe vazhdon të hetohet.”
Autoritetet nuk kanë bërë të ditur shkaqet e zjarrit, ndërsa hetimet janë duke vazhduar për të sqaruar rrethanat e plota të incidentit.
