Gjykata Themelore në Pejë pritet të shpallë sot, në orën 14:30, aktgjykimin në rastin e vrasjes së trefishtë në Gllogjan, një nga ngjarjet më të rënda që ka tronditur Kosovën në vitet e fundit.
Në këtë rast janë të akuzuar Halil Mehmetaj, Kastriot Mehmetaj dhe Kreshnik Mehmetaj, të cilët ngarkohen për sulmin e armatosur ndaj një autobusi më 26 nëntor 2021, në fshatin Gllogjan të Deçanit.
Si pasojë e sulmit humbën jetën shoferi i autobusit, Gani Gjokaj, si dhe dy nxënësit 17-vjeçarë, Ledion Hamzaj dhe Genta Mustafaj. Një pasagjer tjetër mbeti i plagosur.
Në seancën e fundit, Prokuroria kërkoi që tre të akuzuarit të shpallen fajtorë dhe të dënohen me burgim të përjetshëm, duke vlerësuar se provat e administruara gjatë shqyrtimit gjyqësor dëshmojnë përfshirjen e tyre në kryerjen e veprës penale.
Të njëjtin qëndrim e mbajti edhe pala e dëmtuar, e cila kërkoi nga Gjykata shqiptimin e dënimit maksimal ndaj të akuzuarve.
Aktgjykimi pritet të shpallet sot në orën 14:30.
