Qendra Klinike Universitare e Kosovës ka reaguar pas raportimeve të publikuara në disa media, duke siguruar qytetarët se furnizimi me oksigjen medicinal po zhvillohet rregullisht dhe pa asnjë ndërprerje.
Në një njoftim zyrtar, QKUK thekson se pretendimet për mungesë të oksigjenit nuk pasqyrojnë gjendjen reale dhe se ato nuk janë verifikuar përmes Zyrës për Media të QKUK-së dhe Shërbimit Spitalor dhe Klinik Universitar të Kosovës (ShSKUK).
Sipas institucionit, gjatë gjithë kësaj periudhe nuk ka pasur mungesë të oksigjenit medicinal dhe në asnjë moment nuk është rrezikuar trajtimi apo ofrimi i shërbimeve shëndetësore për pacientët.
QKUK bën të ditur gjithashtu se procedurat për lidhjen e kontratës së re të furnizimit me oksigjen janë në proces dhe po zhvillohen sipas procedurave përkatëse.
Në fund, institucioni u ka bërë thirrje mediave që të bazohen në burime zyrtare gjatë raportimit, me qëllim të shmangies së dezinformimit dhe krijimit të shqetësimeve të panevojshme te qytetarët.
