Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka pritur në takim Drejtoreshën për Zgjerim dhe Ballkanin Perëndimor në Komisionin Evropian, Valentina Superti, me të cilën ka diskutuar për prioritetet e bashkëpunimit ndërmjet Kosovës dhe Bashkimit Evropian.
Sipas njoftimit të ministrisë, në fokus të takimit ishin zbatimi i Agjendës së Reformave, avancimi i zhvillimit ekonomik dhe forcimi i kapaciteteve institucionale.
Kusari-Lila prezantoi progresin e arritur në reformën e administratës publike dhe informoi për ecurinë e Projektligjit për Ndërmarrësi dhe Inovacion, si dhe Projektligjit për Kamatvonesat, të cilat synojnë të përmirësojnë mjedisin për sektorin privat.
Gjatë takimit u diskutua edhe për themelimin e Fondit të Inovacionit dhe krijimin e skemave të reja mbështetëse për gratë ndërmarrëse, startup-et dhe inovatorët, me qëllim zhvillimin e ekosistemit të ndërmarrësisë dhe inovacionit në Kosovë.
Palët trajtuan gjithashtu çështjen e barrierave tregtare me Serbinë dhe vendet e Ballkanit Perëndimor, duke theksuar nevojën për një treg më funksional, të integruar dhe konkurrues.
Temë e diskutimit ishte edhe tranzicioni i gjelbër, zhvillimi i parqeve eko-industriale dhe fuqizimi i grave në biznes përmes nismave konkrete, përfshirë konferencën “She Rises 2026” dhe krijimin e një njësie të posaçme në kuadër të agjencisë së re për ndërmarrësi, e dedikuar për mbështetjen e grave ndërmarrëse.
Ministrja në detyrë theksoi se bashkëpunimi me Komisionin Evropian mbetet kyç për avancimin e reformave, rritjen e konkurrueshmërisë së ekonomisë dhe përshpejtimin e procesit të integrimit evropian të Kosovës.
