Instituti Kombëtar i Shëndetësisë Publike i Kosovës ka njoftuar se gjatë periudhës nga 16 prilli deri më 29 qershor 2026 janë konfirmuar gjithsej 47 raste me fruth në Kosovë.
Sipas të dhënave të IKShPK-së, numri më i madh i rasteve është regjistruar në Prishtinë, me 14 raste, pasuar nga Ferizaj me 12 raste dhe Kaçaniku me gjashtë raste. Nga tre raste janë raportuar në Fushë-Kosovë, ndërsa nga dy raste në Lipjan, Vushtrri, Shtime dhe Obiliq. Nga një rast është konfirmuar në Gjilan, Drenas, Deçan dhe Viti.
Përmes një njoftimi zyrtar, IKShPK u ka bërë thirrje qytetarëve që të kërkojnë ndihmë mjekësore sapo të shfaqin simptoma të dyshimta.
“Çdo person me simptoma të dyshimta të fruthit, si temperaturë e lartë, skuqje apo ndryshime në lëkurë, kollë, rrufë ose konjuktivit, duhet të paraqitet menjëherë në institucionet më të afërta shëndetësore”, thuhet në njoftimin e IKShPK-së.
Instituti ka theksuar se, për shkak të infektueshmërisë së lartë të fruthit dhe rrezikut të përhapjes së tij në komunitet, prindërit dhe kujdestarët duhet të kontrollojnë statusin e vaksinimit të fëmijëve të tyre.
“Duke pasur parasysh infektueshmërinë e lartë të fruthit, rrezikun e përhapjes së tij në komunitet dhe komplikimet që shkakton fruthi, IKShPK u bën thirrje prindërve dhe kujdestarëve që të verifikojnë statusin e vaksinimit të fëmijëve të tyre dhe të sigurojnë vaksinimin sipas Kalendarit të rregullt të imunizimit në qendrat e mjekësisë familjare.”
Sipas IKShPK-së, vaksinimi mbetet masa më efektive dhe më e sigurt për parandalimin e fruthit, mbrojtjen e personave të pavaksinuar dhe ruajtjen e shëndetit publik.
