E përfaqësoi Kosovën në Asamblenë Parlamentare të Këshillit të Evropës.
Aty, nënkryetari i Kuvendit, Ardian Gola mori pjesë në debatin mbi raportin “Funksionimi i institucioneve demokratike në Serbi”, ku evidentohen shqetësime serioze lidhur me gjendjen e demokracisë e sundimit të ligjit.
Një pjesë e raportit flet edhe për sulmin terrorist në Banjskë, ku ai kritikoi Serbinë për mungesë llogaridhënie.
Në fjalën e tij, Gola kritikoi edhe formulimin e përdorur për Banjskën duke theksuar se nuk mund të reduktohet në një përplasje mes Policisë dhe personave të armatosur.
Madje sipas tij, fakti që organizatori i sulmit Milan Radoiciq vazhdon të jetë i lirë atje, dëshmon mungesën e gatishmërisë së autoriteteve serbe për përballje me përgjegjësitë e tyre.
Me këtë vlerësim ndaj raportit, pajtohet edhe ish-eprori i Policisë së Kosovës, Reki Morina i cili thotë se është për t’u çuditur.
“Unë mendoj se ajo duhet të jetë më e ashpër ndaj Serbisë në mënyrë që kryerësit e veprës së terrorizmit në Banjskë, vrasësit e rreshterit Afrim Bunjaku dhe cenimit territorial të Kosovës ata duhet të përgjigjen para institucioneve të drejtësisë në bazë të aktakuzave që ata i kanë. Gjithashtu duhet të kihet kujdes nga bashkësia evropiane për shkak se Serbia nuk mund të jetë shtet demokratik derisa e pengon Kosovën në integrimin euroatlantik”, vlerwson ai.
Derisa njohësi i çështjeve të sigurisë, vlerëson se përkundër tentativave, ekzistojnë prova të mjaftueshme e që nuk mund të minimizohet një sulm i tillë.
“E ka betonuar pothuajse edhe sekretari i NATO-s, Mark Rutte andaj të gjithë duhet të jenë racional në këtë rast edhe Parlamenti Evropian apo kushdo prej bashkësisë ndërkombëtare duhet të jetë racional dhe nuk mund të ketë tentim minimizimi edhe po të don dikush sepse kur janë faktet në teren me 4.5 milionë euro armatim të gjetur në teren, me 170 terroristë aty”, shprehet Arben Dashevci.
Raporti i diskutuar gjithashtu evidenton shqetësime serioze lidhur me gjendjen e demokracisë, sundimit të ligjit dhe respektimit të të drejtave të njeriut në Serbi, duke përfshirë parregullsitë zgjedhore, presionin ndaj mediave dhe shoqërisë civile, mungesën e progresit në ndjekjen e krimeve të luftës, e glorifikimin e kriminelëve të luftës.
