Ushtruesja e Detyrës së Presidentes së Republikës së Kosovës, Albulena Haxhiu, ka marrë pjesë sot në ceremoninë hapëse të edicionit të shtatë të Olimpiadës Matematike Kosovë–Shqipëri (KAMO 2026), e cila po mbahet në Prizren.
Në fjalën e saj para të pranishmëve, Haxhiu ka thënë se Prizreni mbetet qytet me histori të pasur, ku, sipas saj, në rrugë, shtëpi, shkolla dhe institucione janë ndërthurur ngjarjet më të rëndësishme kulturore dhe politike të kombit.
Ajo ka theksuar se përmes garave si KAMO, po formësohet edhe e ardhmja e të rinjve, duke vlerësuar rëndësinë e matematikës në zhvillimin e mendimit kritik dhe këmbënguljes.
“Sot, në mendjet e nxënësve që garojnë me dije, përqendrim dhe këmbëngulje po merr formë edhe një pjesë tjetër e së ardhmes, mu në qytetin e Prizrenit. Ju e dini që matematika e mëson njeriun të mos kënaqet me përshtypjen e parë…”, është shprehur Haxhiu.
Sipas saj, kjo olimpiadë ka vlerë të veçantë pasi i mëson nxënësit të mendojnë qartë, të mos dorëzohen përballë vështirësive dhe të kuptojnë se talenti zhvillohet vetëm përmes punës së vazhdueshme.
Haxhiu ka shtuar se pjesëmarrja e nxënësve tregon talent, disiplinë dhe përkushtim, duke vlerësuar edhe rolin e mësuesve, familjeve dhe përgatitjes së tyre.
Ajo ka theksuar se, përtej garës dhe rezultateve, përvoja në olimpiadë ka vlerë afatgjatë në formimin e nxënësve, sidomos në përballjen me sfida dhe zhvillimin e mendimit kritik.
“Përmes KAMO-s, Kosova dhe Shqipëria bëhen bashkë në shkollë, te fëmijët, te mësuesit dhe te dija…”, ka thënë ajo, duke falënderuar organizatorët, Shoqatën e Matematikanëve të Kosovës dhe Shoqatën Shqiptare të Matematikës, si dhe mësuesit dhe prindërit për mbështetjen e nxënësve.
Në fund, Haxhiu ka uruar që KAMO 2026 të jetë një përvojë e suksesshme për të gjithë pjesëmarrësit dhe që Prizreni të mbetet në kujtesën e tyre si qytet i dijes dhe bashkëpunimit.
