Ministri në detyrë i Infrastrukturës dhe Transportit, Dimal Basha, ka inspektuar punimet që po zhvillohen në kyçjen e Mazgit, ku janë duke u realizuar ndërhyrje për sanimin e dëmtimeve në rrugë dhe garantimin e qarkullimit të sigurt për qytetarët.
Gjatë vizitës, Basha tha se gjendja e këtij segmenti rrugor ka qenë shqetësim i qytetarëve, duke rikujtuar se rruga ishte rehabilituar në vitin 2023 dhe ishte riparuar sërish edhe gjatë vitit 2025.
“Sipas vlerësimeve tona fillestare, dëmtimet dyshohet se janë shkaktuar nga depërtimi i ujërave nën trupin e rrugës, në zonën ku kalojnë gypat e ujësjellësit të KRU ‘Prishtina’. Jemi duke e analizuar situatën dhe, në koordinim me KRU ‘Prishtina’, do ta adresojmë shkakun në mënyrë që të parandalojmë përsëritjen e këtij problemi,” deklaroi Basha.
Ai bëri të ditur se, për shkak të rëndësisë së këtij segmenti për qarkullimin dhe sigurinë rrugore, Ministria ka ndërmarrë masa të menjëhershme për sanimin e dëmtimeve dhe rikthimin e qarkullimit të sigurt.
Sipas ministrit, krahas ndërhyrjeve emergjente, do të punohet edhe për një zgjidhje afatgjatë që do të eliminojë shkaqet e problemit dhe do të parandalojë përsëritjen e dëmtimeve në këtë pjesë të rrugës./teve1.info/
