Prokuroria Themelore në Prishtinë ka ngritur aktakuzë ndaj dy personave, të identifikuar me inicialet B.K. dhe N.Rr., nën dyshimin për kryerjen e veprave penale “Keqpërdorimi i pozitës apo autoritetit zyrtar” dhe “Ushtrimi i ndikimit”.
Sipas Prokurorisë, i pandehuri B.K., në cilësinë e Kryeshefit Ekzekutiv të Kompanisë Rajonale të Mbeturinave “Pastrimi”, gjatë viteve 2020 dhe 2021 ka tejkaluar kompetencat e tij duke mos respektuar procedurat ligjore të punësimit.
Ai dyshohet se ka nënshkruar 89 kontrata pune, përfshirë 37 kontrata me afat të caktuar, pa shpallur konkurs publik dhe në kundërshtim me dispozitat e Ligjit të Punës.
Aktakuza thekson se personat e punësuar kanë mbuluar pozita të rregullta pune, ndërsa janë nxjerrë edhe vendime për avancime pa respektuar procedurat përkatëse.
Sipas organit të akuzës, këto veprime i kanë shkaktuar ndërmarrjes një dëm financiar prej 114,535.06 eurosh.
Ndërkaq, i pandehuri N.Rr., në cilësinë e koordinatorit në KRM “Pastrimi”, dyshohet se gjatë marsit të vitit 2021 ka kërkuar dhe marrë nga 1,500 euro nga disa persona, duke u premtuar atyre punësim në kompani.
Sipas Prokurorisë, ai ka pretenduar se do të ushtronte ndikim të kundërligjshëm në vendimmarrjen e kryeshefit ekzekutiv për realizimin e punësimeve.
Prokurori i rastit i ka propozuar gjykatës që, pas shqyrtimit dhe vlerësimit të provave, të pandehurit të shpallen fajtorë dhe të dënohen në përputhje me legjislacionin në fuqi./teve1.info/
