Shtetet e Bashkuara dhe Irani kanë nënshkruar një memorandum mirëkuptimi që synon t’i japë fund konfliktit mes dy vendeve dhe të hapë rrugën për një marrëveshje përfundimtare paqeje. Dokumenti parashikon ndërprerjen e luftimeve, rihapjen e Ngushticës së Hormuzit dhe nisjen e negociatave intensive gjatë 60 ditëve të ardhshme.
Sipas tekstit të memorandumit, ShBA-ja është zotuar të lehtësojë qasjen e Iranit në asetet e ngrira dhe të ndërmarrë hapa drejt zbutjes së sanksioneve, ndërsa Irani ka riafirmuar se nuk do të prodhojë dhe as nuk do të sigurojë armë bërthamore. Po ashtu, Teherani është angazhuar të ndihmojë në rikthimin e trafikut detar në Gjirin Persik dhe Gjirin e Omanit në nivelet para konfliktit.
Marrëveshja përfshin edhe rihapjen e Ngushticës së Hormuzit, një nga korridoret më të rëndësishme energjetike në botë. Për 60 ditët e ardhshme nuk pritet të ketë tarifa për anijet që kalojnë nëpër këtë rrugë detare, megjithëse zyrtarët iranianë kanë lënë të kuptohet se çështja mund të rishqyrtohet më vonë, raporton BCC.
Një pjesë e rëndësishme e memorandumit është periudha 60-ditore e negociatave, gjatë së cilës palët do të përpiqen të arrijnë marrëveshje për çështjet më të ndjeshme, përfshirë programin bërthamor iranian. Uraniumi i pasuruar i Iranit pritet të vendoset nën mbikëqyrje ndërkombëtare dhe të përpunohet sipas kushteve që do të dakordohen nga negociatorët.
Megjithatë, zyrtarët amerikanë dhe iranianë kanë theksuar se bëhet fjalë për një marrëveshje paraprake dhe jo për një paqe përfundimtare.
