Në çdo moment ishin bashkë.
Përveç në luftë edhe në gëzime, Sahit Jashari ishte përkrah Adem dhe Hamëz Jasharit.
E të premten, qytetarë të shumtë u mblodhën për t’i dhënë lamtumirën e fundit, njërit nga themeluesit të Ushtrisë Çlirimtare të Kosovës.
Përveç dhimbjes, xhaxhin e saj e kujton me shumë krenari edhe Sala Jashari.
“Të rritesh nga heronjë si Salë e Ahmet Jashari medoemos i përgatit djemtë për t’ia fal atdheut. Kështu që sot normalisht që është dhimbje për atdheun por në të njëjtën kohë kur e kujtojmë mënyrën se si janë përgatitur ata për këtë atdhe, besoj që axhi ka pasur mundësi ta shoh lirinë që kanë sakrifikuar prindërit e tij”, deklaroi mbesa e Sahit Jasharit, Sala.
Mes emocioneve, ajo rrëfeu për televizionin, kontributin e Sahitit gjatë luftës.
“Kanë qenë pikërisht të shtënat e Sahit Jasharit që do ta fillonte luftën dhe do të njoftonte gjithë lagjen që policia serbe po tentonte të rrethonte Prekazin dhe të gjente djemtë që po themelonin Ushtrinë Çlirimtare të Kosovës. Ka qenë njëri ndër shokët e ngushtë të Adem Jasharit, prej atyre të parëve që kanë shkuar në Shqipëri për t’u trajnuar që t’i dalë Zot atdheut”, tha ajo.
Përveç që i doli në mbrojtje atdheut, ish komandanti i UÇK-së ishte ai që edhe u jepte kurajo bashkëluftëtarëve për të mos ndalur luftën për liri.
“Sahit Jashari na ka jep kurajo gjithë neve luftarakëve, ai nuk ka qëndruar prapa neve por Sahit Jashari gjithmonë ka qenë në vijën e parë të frontit. Unë e kam parë më sytë e mijë luftën titanike tëSahit Jasharit”, deklaroi kryetari i OVL-UÇK-së, Hysni Gucati.
Lajmi për ndarjen nga jeta i Sahit Jasharit, ishte i rëndë edhe për shumë qytetarë.
“Me pikëllim e morëm lajmin për vdekjen e Sahit Jasharit i cili pra i takon familjes Jashari i cili ishte kyçur në UÇK që në celulat e para, bashkërisht me Adem Jasharin dhe shokët e tjerë”, u shpreh qytetari Shaqir Bejta.
Varrimi i Sahit Jasharit u bë në varrezat e fshatit Prekaz në Skenderaj.
