Një person është arrestuar në Skenderaj nën dyshimin se ka kryer veprën penale të dhunimit ndaj një vajze të mitur.
Sipas raportit të Policisë së Kosovës, rasti dyshohet të ketë ndodhur më 7 qershor 2026, ndërsa i dyshuari është arrestuar më 10 qershor.
“Skenderaj / 07.06.2026 – 03:00. Më 10.06.2026 është arrestuar i dyshuari mashkull kosovar për shkak se i njëjti dyshohet se ka kryer veprën e lartcekur ndaj viktimës femër kosovare. I dyshuari pas inicimit të rastit me vendim të prokurorit është dërguar në mbajtje”, thuhet në raportin policor.
Lidhur me rastin, zëdhënësi i Prokurorisë Themelore në Mitrovicë, Valon Preteni, ka konfirmuar për Tëvë1 se viktima është e mitur dhe se ndaj të dyshuarit është caktuar masa e ndalimit prej 48 orësh.
“Po, vajza është e mitur. Personi i dyshuar është ndaluar për 48 orë. Rasti është duke u hetuar”, tha Preteni.
Tutje poashtu ai ka bërë ta ditur se:
“Mund të konfirmojmë se është ndaluar një (1) person për shkak të veprës penale ‘Dhunimi’. Brenda afatit ligjor do të paraqitet kërkesa për sigurimin e prezencës së të pandehurit në procedurë. Rasti është duke u hetuar. Meqë viktima është e mitur, në këtë fazë nuk mund të ofrojmë më shumë të dhëna”, thuhet në përgjigjen e Prokurorisë.
Përndryshe, nuk ka detaje të tjera për shkak të ndjeshmërisë së rastit dhe moshës së viktimës, ndërsa hetimet janë në vazhdim.
