Analisti dhe gazetari serb nga Kosova, Radomir Dimić, ka publikuar një reagim të ashpër lidhur me mënyrën se si Serbia e trajton identitetin e saj shtetëror dhe raportet me fqinjët në rajon.
Në shkrimin e tij, Dimić thotë se “ironia më e madhe” është se të gjitha shtetet fqinje e kanë të qartë se ku janë kufijtë e Serbisë, ndërsa vetë Serbia, sipas tij, “vazhdon të zhvillojë një debat të pafund me vetveten”.
“Bosnja dhe Hercegovina e di ku është Serbia. Kroacia e di ku është Serbia. Maqedonia e Veriut e di ku është Serbia. Natyrisht, edhe Republika e Kosovës e di ku është Serbia. Vetëm Serbia ende nuk e di se ku i ka kufijtë dhe kah po shkon”, shkruan ai.
Dimić vlerëson se fakti që Serbia nuk e feston në mënyrë të natyrshme “ditën e saj të pavarësisë”, tregon se shteti ende nuk e ka pranuar realitetin politik pas shpërbërjes së ish-Jugosllavisë.
“Një shtet që nuk mund ta festojë ditëlindjen e vet, dërgon mesazhin se ende nuk e ka pranuar vetveten”, thekson ai.
Në reagimin e tij, ai përmend edhe deklaratën e kryeministrit të Kosovës, Albin Kurti, duke thënë se nuk e habisin fjalët e Kurtit se “kur fqinji kërcënon, duhet ta mbash pushkën të mbushur”.
Sipas Dimićit, Serbia vazhdon të mbajë ambicie territoriale ndaj fqinjëve dhe nuk është shkëputur plotësisht nga politika nacionaliste e viteve ’90.
“Serbia dhe udhëheqësi i saj, Aleksandar Vučić, nuk heqin dorë nga territoret fqinje”, shkruan ai, duke e lidhur këtë me konceptin e ashtuquajtur të “botës serbe”.
Ai ironizon këtë ide duke thënë se, sipas asaj logjike, “edhe Çikagoja, Vjena dhe Sidneji do të ishin Serbi”, vetëm pse aty jetojnë serbë.
Në fund të reagimit të tij, Dimić thotë se ideja e “Serbisë së Madhe” mbetet një fantazi politike e parealizueshme.
“Le t’i mbajnë për vete apetitet dhe ambiciet për më shumë, sepse nuk do t’u realizohen”, përfundon ai.
