Kryesia e Partia Demokratike e Kosovës ka mbajtur sot mbledhjen e radhës, ku ka diskutuar rezultatin e zgjedhjeve dhe hapat e ardhshëm politikë e organizativë të partisë.
Sipas vlerësimit të Kryesisë, pjesëmarrja më e ulët në zgjedhje krahasuar me ciklet e kaluara, me rreth 200 mijë votues më pak, “përbën një sinjal serioz që reflekton lodhjen e qytetarëve nga krizat e njëpasnjëshme politike, polarizimin e madh shoqëror dhe zhgënjimin e akumuluar gjatë viteve të fundit”.
Në mbledhje u diskutua edhe ndikimi i rrethanave politike dhe ekonomike në rezultatin zgjedhor.
Sipas PDK-së, masat financiare dhe subvencionet e shpërndara nga Qeveria në prag të zgjedhjeve kanë ndikuar në krijimin e perceptimit te një pjesë e elektoratit opozitar se rezultati zgjedhor ishte i paracaktuar, duke ndikuar në dekurajimin e tyre për të dalë në votime.
Pavarësisht këtyre rrethanave, kryesia vlerësoi se PDK-ja “mbetet subjekti më i madh opozitar, duke ruajtur përqindjen e përfaqësimit politik, me mundësi rritjeje të lehtë të numrit të deputetëve në Kuvendin e Republikës së Kosovës”.
Kryetari i partisë, Bedri Hamza, theksoi se gjatë periudhës së fundit PDK-ja është përballur me procese të shumta zgjedhore, duke mos pasur kohën e nevojshme për riorganizim dhe konsolidim të strukturave të saj.
Në këtë takim u diskutua edhe procesi i zgjedhjeve të brendshme partiake, të cilat, sipas Kryesisë, do të jenë të hapura, fer dhe gjithëpërfshirëse, me synim krijimin e hapësirës për ide të reja, energji të reja dhe përfshirje më të madhe të gjeneratave të reja në strukturat drejtuese të PDK-së.
Kryesia bëri të ditur se ekziston mundësia që procesi i brendshëm zgjedhor të fillojë në shtator të vitit 2026.
Po ashtu, u ritheksua rëndësia e përmbylljes së procesit gjyqësor në Dhomat e Specializuara të Kosovës ndaj ish-liderëve të PDK-së dhe bashkëluftëtarëve të tyre, duke e cilësuar atë “një proces me rëndësi të veçantë për lirinë, pavarësinë dhe të ardhmen e Kosovës”.
“Partia Demokratike e Kosovës mbetet e përkushtuar për të reflektuar mbi secilin mësim të nxjerrë nga procesi zgjedhor dhe për të vazhduar punën në shërbim të qytetarëve dhe interesit shtetëror të Republikës së Kosovës”, thuhet në njoftimin e partisë./teve1.info/
