Kapiteni i Manchester United, Bruno Fernandes, ka shkruar emrin e tij në librat e historisë së futbollit anglez në xhiron e fundit të kampionatit.
Në ndeshjen si mysafir kundër Brightonit, Fernandes asistoi me një krosim të përsosur nga korneri për golin me kokë të Patrick Dorgu, duke arritur në kuotën e 21 asistimeve brenda një sezoni të vetëm në Premier Ligë.
Me këtë asistim, portugezi ka thyer rekordin e përbashkët prej 20 asistimesh që mbahej nga dy legjenda të këtij kampionati: Thierry Henry dhe Kevin De Bruyne. Javën e kaluar, Bruno kishte barazuar këtë shifër pas një pasimi për Bryan Mbeumo, ndërsa sot u shkëput zyrtarisht si lideri i vetëm i të gjitha kohërave.
Edhe pse u shpall “Lojtari i Vitit në Premier Ligë” dhe fitoi çmimin nga gazetarët (FËA), Fernandes u shpreh mjaft modest për këtë arritje historike:
“Jam shumë i lumtur dhe shumë krenar. Kur i afrohesh këtij rekordi, fillon të mendosh shumë për të. Po flasim për Thierry dhe Kevin, dy nga emrat kryesorë të Premier Ligës. Jam shumë mirënjohës dhe i lumtur që e arrita këtë.”
Statistikat e Opta tregojnë se nga 21 asistimet e Brunos këtë sezon, 10 erdhën nga loja e hapur dhe 11 nga ndërprerjet, duke u shndërruar në një “makinë kreative” të vërtetë nën urdhrat e Manchester United.
