Kryeministri në detyrë i Kosovës dhe kryetari i Lëvizjes Vetëvendosje, Albin Kurti, ka kërkuar nga qytetarët që në zgjedhjet e 7 qershorit ta mbështesin subjektin e tij politik me mbi 500 mijë vota.
Përmes një postimi në Facebook, Kurti ka kujtuar rezultatet zgjedhore të partisë së tij, duke theksuar se në zgjedhjet qendrore të 9 shkurtit të vitit të kaluar, Lëvizja Vetëvendosje kishte marrë afër 400 mijë vota, ndërsa më 28 dhjetor, sipas tij, kishin arritur afër 500 mijë vota.
“Më 9 shkurt të vitit të kaluar Lëvizja VETËVENDOSJE! i pati afër 400 mijë vota në zgjedhjet qendrore. Më 28 dhjetor arritëm bashkë afër 500 mijë vota. E më 7 qershor le t’i kalojmë 500 mijë vota dhe ta shënojmë fitoren e radhës, edhe më të madhe e vendimtare, që t’i japim shtetit tonë institucione funksionale e t’ia mbyllim bllokut opozitar shtigjet të cilat po i shfrytëzojnë për ta mbajtur shtetin peng”, ka shkruar Kurti.
Ai ka thënë se nga Gjilani dhe Anamorava kanë vazhduar mobilizimin për zgjedhjet e ardhshme, duke theksuar investimet në arsim, siguri, ushtri dhe mbështetje sociale për qytetarët.
“Nga Gjilani dhe Anamorava e vazhduam mobilizimin për zgjedhjet e ardhshme. Brezave aktual dhe atyre që do të vijnë pas nesh duhet t’ua lëmë trashëgimi një Kosovë gjithnjë e më të zhvilluar dhe prosperuese. Po ndërtojmë shkollat dhe çerdhet; po investojmë në ushtri, mbrojtje e siguri, me pajisje e armatim, industri dhe prodhim; po e rrisim mbështetjen për fëmijët dhe studentët, nënat lehona dhe të gjitha familjet. Dora e mirë e shtetit po prek aty ku më herët nuk shfaqej dot. 116 është numri, 7 qershori është dita, kur votojmë për progresin shoqëror, rritjen ekonomike dhe sigurinë shtetërore e qytetare”, ka përfunduar ai./teve1.info/
