Ministrja në detyrë e Ministrisë së Drejtësis, Donika Gërvalla, ka deklaruar në emisionin “Këndi i Debatit” në Tëvë1 se Vjosa Osmani nuk i kishte votat e nevojshme për t’u zgjedhur presidente më 4 mars, pavarësisht se kishte shprehur vullnetin për të kandiduar.
Gërvalla tha se Osmani i kishte të sigurta vetëm votat e partisë Guxo.
“Çfarë unë mund të garantoj është që Vjosa Osmani i ka pasur 7 votat e partisë Guxo. Ajo është pjesa për të cilën përgjigjem unë. Shtatë vota i ka pasur Osmani për datën 4 mars”, ka deklaruar Gërvalla.
E pyetur nëse kishte pasur diskutime mes partisë Guxo dhe partnerit të tyre, Lëvizjes Vetëvendosje, për mungesën e mbështetjes ndaj Osmanit, Gërvalla tha se ajo asnjëherë nuk ka deklaruar se LVV-ja nuk do ta mbështeste Osmanin.
“Unë asnjëherë nuk kam thënë që LVV-ja nuk do ta kishte mbështetur Vjosa Osmanin më 4 mars, nëse do të kishim mundur ta siguronim praninë e 80 deputetëve në sallë, por nuk e kemi siguruar. Z. Kurti e ka thënë që na duheshin 85 vota. Pse ka thënë që na duheshin 85, jam e sigurt që do të kishte pasur ndonjë votë edhe në koalicionin e LVV-së që do të kishte devijuar nga shumica. Por më 4 mars, Vjosa Osmani do të ishte zgjedhur presidente po t’i kishim nënshkrimet dhe praninë e partive opozitare”, është shprehur ajo.
Duke folur për deklaratat se Osmani i kishte 82 vota, Gërvalla insistoi se ky numër nuk kishte ekzistuar realisht.
“Si t’ia jepnim nënshkrimet, për çka? Nuk i ka pasur 82 vota, siç është deklaruar. Unë kam qenë pjesë e të gjitha proceseve. Ndoshta e kanë informuar gabim zonjën Osmani. Ndoshta i njëjti Lumir Abdixhiku që neve na tregonte që nuk ka vota të LDK-së për Vjosa Osmanin, ndërsa Vjosa Osmanit i ka thënë që do t’i japim votat për ty. Unë jam përpjekur që me 7 nënshkrimet e partisë Guxo të ofroj një platformë ku LDK-ja të nënshkruajë, sepse nënshkrimi tregon një farë zotimi që do të qëndrosh në sallë. Ka vetëm një të vërtetë për 4 marsin: ne nuk i kemi parë 80 vota apo më tepër të pranishme në sallë. Çka ka ndodhur më 5 mars është krejt tjetër”, ka përfunduar Gërvalla./teve1.info/
