Faktorizim të votës së shqiptarëve, e ka cilësuar Izet Mexhiti bashkimin në një parti të vetme të koalicionit VLEN në Maqedoninë e Veriut.
Në një lidhje Skype me Ditarin e pasdites me Pandi Gjatën në A2 CNN, bashkëkryetari i Vlen, tha se synohet dhënia fund e përçarjes politike mes shqiptarëve.
“Shqiptarët në 30 vite ose janë ballafaquar me monopol politik, ose me shpërndarje në shumë parti të vogla e fraksione të ndryshme duke defaktorizuar votën. Kemi bashkuar opozitën shqiptare dhe tashmë është pozitë shqiptare. Ashtu siç janë të organizuar edhe shumica maqedone në dy partitë VMRO dhe LSDM, edhe shqiptarët janë të fokusuar dhe të organizuar jo në monopol politik jo të përçarë në shumë parti politike, por në dy parti pra në Vlen dhe BDI”, theksoi ai.
Për herë të parë në pluralizmin politik shqiptar në Maqedoninë e Veriut, partia do të drejtohet nga dy bashkëkryetarë, Bilall Kasami dhe Izet Mexhiti.
Sipas këtij të fundit, modeli është frymëzuar nga demokracitë skandinave dhe synon largimin nga modeli i liderit të vetëm.
“Sjellim një një standard të ri në politikën shqiptare, me bashkëkryetarë model që nuk e kemi shpik ne por e kemi marrë nga shtetet skandinave. Është një balancë dhe ndarje e përgjegjësive. Është një një vlerë demokratike e re”.
Ai deklaroi se VLEN ka fituar në rreth 70% të komunave shqiptare dhe tashmë po zbehen ndarjet mes partive që dikur formonin koalicionin.
“Duke pasur parasysh edhe zgjedhjet lokale, ku VLEN është fitues absolut me 70% komunave shqiptare dhe duke sjellë konkurrencën, uroj që kjo konkurrencë të jetë konkurrencë e ideve e programeve e platformave. “Më herët ishte imperativ bashkimi i opozitës shqiptare edhe funksionoi në kuadër të koalicionit Blen. imperativi i ri është që të ky koalicion pra të shkrihet të bëhet një subjekt që shqiptarët t’ju ofrojnë dy alternativa, një pozitë e fuqishme dhe një opozitë e fuqishme dhe normal kur është përplasja e ashpër ndërmjet dy blloqeve në fund fitues janë votuesit, janë shqiptarët pra e faktorizon. Pra ishte kongresi i parë themelues, por edhe kongresi i bashkimit, i unifikimit. Ky kongres padyshim ishte i pari”.
Mexhiti vlerësoi praninë në kongres të kryeministrit të Maqedonisë së Veriut, Hristijan Mickoski, si dhe kryeministrit të Kosovës, Albin Kurti.
Mexhiti e cilësoi praninë e Mickoskit si një shenjë respekti ndaj partneritetit qeverisës me VLEN, ndërsa tha se partia synon të jetë një urë lidhëse mes Shkupit, Prishtinës dhe Tiranës.
Ai konfirmoi gjithashtu se në fillim të qershorit pritet një rikonstruksion i qeverisë në Maqedoninë e Veriut, për të cilin, sipas tij, tashmë ka dakordësi parimore mes partnerëve të koalicionit.
