Kryetari i Partisë Demokratike të Kosovës, Bedri Hamza, në konferencë për media pas mbledhjes së Kryesisë ka njoftuar se Fatmir Limaj nuk do të jetë pjesë e listës së PDK-së për zgjedhjet e parakohshme të 7 qershorit.
Profesori, Basri Muja e ka vlerësuar si të drejtë dhe të kuptueshëm këtë vendim të PDK-së, duke pasur parasysh, sipas tij, periudhën e gjatë gjatë së cilës PDK dhe Nisma Socialdemokrate kanë vepruar të ndara politikisht.
Muja ka vlerësuar pozitivisht edhe qëndrimin e Nismës për të mos insistuar që të bëhet menjëherë pjesë e listës zgjedhore.
“Mendoj që është e kuptueshme. Limaj ka kohë që është ndarë me PDK-në. Kanë pasur qëndrime të kundërta në shumë zgjedhje dhe kanë garuar edhe kundër njëri-tjetrit. Këto bashkime dhe ribashkime të shpejta nuk janë të shëndetshme. Për një proces më jetëgjatë dhe afatgjatë, mënyra e veprimit të PDK-së është më e mirë”, ka deklaruar Muja në emisionin Ditari në Tëvë1.
Sipas tij, fillimisht duhet të ketë integrim dhe strukturim të njerëzve brenda subjektit politik, e më pas të shqyrtohet mundësia për garim të përbashkët në zgjedhjet e ardhshme.
“Unë absolutisht e vlerësoj këtë qëndrim edhe të Limajt, i cili nuk ka insistuar të jetë menjëherë në listë, por edhe të PDK-së, e cila në njëfarë mënyre ia ka hapur dyert Nismës. Megjithatë, është një proces që kërkon pak më shumë kohë”, ka shtuar ai./teve1.info./
