Prokuroria Themelore në Ferizaj ka bërë të ditur se i ka propozuar Gjykatës Themelore në Ferizaj caktimin e masës së paraburgimit ndaj të pandehurit me inicialet V.N., nën dyshimin për kryerjen e veprës penale “Mashtrimi”.
Sipas njoftimit zyrtar, kërkesa lidhet me rastin e datës 29 prill 2026, kur fillimisht ishin ndaluar dy persona të dyshuar me inicialet A.L. dhe R.J., ndërsa i dyshuari V.N., që dyshohet se ishte i përfshirë në rast, kishte arritur të largohej nga vendi i ngjarjes.
Prokuroria njofton se ekziston dyshimi i bazuar se më 17 prill 2026, rreth orës 19:00, në rrugën “Cen Dugolli” në Ferizaj, i pandehuri V.N., në bashkëkryerje me A.L. dhe R.J., me qëllim të përfitimit të kundërligjshëm pasuror, kanë mashtruar disa persona duke u paraqitur rrejshëm si posedues të kriptovalutave të llojit USDT.
Sipas organit të akuzës, të dyshuarit kishin pretenduar se do të transferonin kriptovalutat përmes portofolit digjital “wallet”, ndërsa për realizimin e skemës kishin siguruar fillimisht një lokal me qira dhe kishin organizuar takim me të dëmtuarit me inicialet E.F., A.F. dhe Rr.K.
Në njoftim thuhet se të dyshuarit arritën t’ua marrin viktimave shumën prej 12 mijë eurosh dhe më pas u larguan në drejtim të panjohur.
Tutje, Prokuroria ka bërë të ditur se pas veprimeve operative është zbuluar se të dyshuarit dyshohej se planifikonin ta përsërisnin të njëjtën skemë mashtrimi në rrugën “Ismail Reka” në Kaçanik.
I dyshuari V.N. ndodhet nën masën e ndalimit 48-orësh që nga 7 maji 2026, me vendim të Prokurorit të Shtetit./teve1.info/
