Profesori universitar, Dashamir Bërxulli, ka komentuar diskursin politik të Lëvizjes Vetëvendosje, duke thënë se një nga arsyet kryesore të mbështetjes së saj elektorale lidhet me mënyrën se si komunikon me diasporën.
Sipas tij, LVV-ja arrin të ngjallë emocione te mërgata përmes një diskursi që lidhet me shtetin, sovranitetin dhe barazinë me vendet evropiane.
Ai ka shtuar se kryeministri Albin Kurti, sipas tij, di ta artikulojë më mirë këtë qasje politike sesa partitë e tjera, duke ndikuar në ndjenjat e diasporës për shtetin e Kosovës.
“Diskursin që e ka LVV-ja tregon edhe arsyeje se pse ka më së shumti vota. LVV-ja u ngjall emocione diasporës, të cilët kanë lidhje me funksionimin e shtetit, gjë që s’po e bëjnë partitë e tjera në dimensionin siç e bën Albin Kurti. Kurti di ta bëjë më së miri këtë gjë. I prek emocionet e tyre, të cilët kanë të bëjnë me një shtet, i cili është i barabartë me Evropën, i cili vendos për vetën e vetë dhe një diskurs i tillë sovranit, që e para, s’është i vërtetë dhe krijohet përshtypja që të gjithë po e pengojnë Kurtin për atë që po mendon ta bëjë dhe s’po e lënë që gjashtë vite. Kjo është arsyeja që një gjë është e rëndësishme dhe është në favor të LVV-së”, tha ai në emisionin “Këndi i Debatit” në Tëvë1.
