Zyra e Kombeve të Bashkuara për të Drejtat e Njeriut të mërkurën i ka bërë thirrje Izraelit që të lirojë “menjëherë dhe pa kushte” dy anëtarët e flotës humanitare globale Sumud të cilët u ndaluan në det dhe po mbahen nga Izraelit pa akuza.
“Izraeli duhet të lirojë menjëherë dhe pa kushte anëtarët e Flotës Globale Sumud, Saif Abukeshek dhe Thiago de Avila, të cilët u ndaluan në ujërat ndërkombëtare dhe u dërguan në Izrael ku po vazhdojnë të mbahen pa akuza,” tha zëdhënësi Thameen Al-Kheetan në një deklaratë.
“Nuk është krim që të shprehësh solidaritet dhe të provosh të dërgosh ndihma humanitare për popullsinë palestineze në Gaza, të cilët janë në nevojë të madhë për të,” u shpreh ai.
Al-Kheetan tha poashtu se akuzat e një “keqtrajtimi të ashpër” ndaj dy anëtarëve duhet të hetohen dhe përgjegjësit të sillen para drejtësisë.
Ai bëri thirrje më tutje që t’i jepet fund “ndalimit arbitrar” nga ana e Izraelit dhe legjislacionit të përcaktuar gjerësisht për terrorizmin, duke thënë se praktikat ishin në kundërshtim me ligjin ndërkombëtar të të drejtave të njeriut.
Misioni i Pranverës 2026 i Flotiljes Globale Sumud, që synonte thyerjen e bllokadës së Izraelit në Rripin e Gazës dhe shpërndarjen e ndihmës humanitare, u ndërpre nga forcat izraelite vonë më 29 prill në brigjet e Kretës.
Forcat izraelite ndërhynë në ujërat ndërkombëtare, duke sulmuar anije që transportonin aktivistë rreth 600 milje detare nga Gaza dhe vetëm pak milje nga ujërat territoriale greke.
Një total prej 177 aktivistësh u ndaluan dhe thuhet se iu nënshtruan keqtrajtimit, shkruan Anadolu.
Izraeli ka vendosur një bllokadë shkatërruese në Rripin e Gazës që nga viti 2007, e cila u përkeqësua pas luftës që filloi në tetor të vitit 2023, duke i lënë 2.4 milionë banorët e territorit në prag të urisë.
