“Këshilli Prokurorial duhet sa më parë që të shpallë konkursin, por duhet të sigurohet që procesi të mos jetë i kompremetuar qysh ka ndodhur në të kaluarën”.
Nga cilësia e ushtrueses së detyrës së presidentes, Albulena Haxhiu dërgoi këtë mesazh për Këshillin Prokurorial të Kosovës.
Sipas Haxhiut, procesi paraprak përmes së cilit Blerim Isusaj u propozua për kryeprokuror, është i dështuar.
Prej disa javësh, Këshilli Prokurorial është bërë me kryesues të ri dhe përbërje të re.
Kështu, profesori Mazllum Baraliu, vlerëson se KPK-ja duhet të veproj pa vonesa dhe ta nis procesin nga e para.
“Shpresoj se me një strukturë të re të Këshillit Prokurorial, që do të ketë zbatim të plotë e të mirëfilltë të dispozitave ligjore për zgjedhjen e kryeprokurorit të shtetit. Dhe prandaj, pa u vonuar tashmë se mjaftë vonë është, edhe nga ata që janë kompetentë për shpalljen e konkursit do duhej që të vazhdojë procedura dhe të respektohet në plotni ligji përkatës për ta pasur sa më parë Kosova, kryeprokurorin e shtetit”, tha Baraliu.
Posti i kryeprokurorit të shtetit është me ushtrues detyre që nga vitit 2022.
Prandaj, avokati Valdet Hoxha thotë se çdo vonesë në këtë proces konsiderohet si e papranueshme.
“Është e pafalshme që edhe më tutje vendi të jetë pa kryeprokuror të shtetit, prandaj natyrshëm që Këshilli Prokurorial i Kosovës duhet që në pajtim të plotë me kornizën ligjore dhe kushtetuese të procedojë me hapjen e konkursit të ri për emërimin e kryeprokurorit të shtetit”, tha avokati Valdet Hoxha.
Pas dështimit të zgjedhjes së Presidentit, Albulena Haxhiu ka të drejtë që ta ushtroj këtë detyrë deri në gjashtë muaj.
Organizatat e Shoqërisë Civile të cilat e monitorojnë sistemin e drejtësisë, në vazhdimësi kanë theksuar se procesi i përzgjedhjes së kryeprokurorit nuk duhet të politizohet.
Një grup i tyre që monitoruan rekomandimin e KPK-së që Blerim Isufaj të zgjedhej kryeprokuror, e vlerësuan gjithë procesin si të komprometuar. Kjo për shkak se sipas tyre, jo të gjithë kandidatët u trajtuan në mënyrë të barabartë.
Bazuar në këto rekomandime, mirëpo edhe në ato të Ambasadës Britanike, Presidentja Vjosa Osmani vendosi që të mos e dekretoj Blerim Isufajn për kryeprokuror.
