Kosova po merr pjesë në panairin ndërkombëtar “Foire de Paris 2026”, i cili ka nisur më 30 prill dhe do të zgjasë deri më 11 maj në Paris, Francë.
Pjesëmarrja është organizuar nga Ministria e Industrisë, Ndërmarrësisë, Tregtisë dhe Inovacionit, përmes Agjencisë për Investime dhe Përkrahjen e Ndërmarrjeve në Kosovë (KIESA).
Në këtë panair, Kosova po prezantohet me një hapësirë të dedikuar ekspozuese, ku po promovon potencialin e saj në disa sektorë kyç, përfshirë turizmin, gastronominë, industrinë ushqimore dhe të pijeve, si dhe fushat e investimeve, eksportit, artizanatit dhe inovacionit.
Sipas MINT-it, përmes këtij prezantimi vendi synon të forcojë imazhin si një destinacion tërheqës turistik, duke vënë në pah bukuritë natyrore, trashëgiminë kulturore dhe ofertën e larmishme turistike.
Po ashtu, vëmendje e veçantë po i kushtohet promovimit të produkteve dhe shërbimeve vendore, të cilat paraqiten si cilësore dhe me potencial të lartë për eksport në tregjet ndërkombëtare.
Pjesëmarrja në “Foire de Paris 2026” po shfrytëzohet edhe për krijimin e kontakteve të reja me kompani ndërkombëtare, investitorë dhe partnerë biznesorë, me synim zgjerimin e bashkëpunimit ekonomik dhe rritjen e eksporteve nga Kosova.
“Ky panair mbledh mijëra ekspozues nga mbarë bota dhe përfshin një gamë të gjerë sektorësh, duke ofruar një platformë të rëndësishme për promovimin ndërkombëtar të produkteve dhe shërbimeve”, thuhet në njoftim.
Panairi do të mbetet i hapur për vizitorë deri më 11 maj 2026./teve1.info/
