Ministri i Bujqësisë, Pylltarisë dhe Zhvillimit Rural, Armend Muja, ka pritur në një takim të ngarkuarën me punë në Ambasadën e Shteteve të Bashkuara të Amerikës në Prishtinë, Annu Prattipati, ku u diskutua thellimi i bashkëpunimit në sektorin e bujqësisë.
Sipas njoftimit, në qendër të takimit ishte avancimi i projekteve të përbashkëta që synojnë zhvillimin e qëndrueshëm të sektorit bujqësor dhe forcimin e kapaciteteve institucionale në Kosovë.
Gjatë takimit, Prattipati e ka uruar Mujen për detyrën e tij të re, duke ritheksuar se SHBA mbetet një partner i rëndësishëm i Kosovës në mbështetjen e Ministrisë së Bujqësisë përmes projekteve dhe iniciativave zhvillimore.
Nga ana e tij, Muja ka shprehur mirënjohje për mbështetjen e vazhdueshme të Shteteve të Bashkuara dhe vlerësoi bashkëpunimin e deritanishëm, duke theksuar nevojën për thellim të mëtejmë të partneritetit në funksion të zhvillimit të sektorit dhe përmirësimit të mirëqenies së fermerëve në Kosovë.
Në përmbyllje të takimit, Muja ka vlerësuar rolin e SHBA-së si partner strategjik të Kosovës në zhvillimin institucional dhe ekonomik, ndërsa të dy palët janë pajtuar për vazhdimin e bashkëpunimit dhe koordinimin e aktiviteteve të përbashkëta në të ardhmen./teve1.info/
