Policia e Kosovës ka njoftuar se gjatë një periudhe 10-ditore në Fushë Kosovë janë shqiptuar mbi 250 gjoba për kundërvajtje të ndryshme në trafik, ndërsa 24 motoçikleta dhe skuterë janë larguar nga qarkullimi për shkak të përdorimit në kundërshtim me ligjin.
Sipas njoftimit, këto veprime janë realizuar në kuadër të planit operativ “Motoçikletat”, i nisur nga Policia e Kosovës, përkatësisht nga Njësiti i Trafikut Rajonal në Prishtinë.
Ky plan synon kontrollin sistematik të rrugëve magjistrale, nacionale dhe atyre urbane, me qëllim rritjen e disiplinës së shoferëve dhe përmirësimin e sigurisë në komunikacion.
Faza e parë e këtij operacioni është përmbyllur në Fushë Kosovë, ku rezultatet, sipas policisë, tregojnë për një disiplinim më të madh të shoferëve dhe përmirësim të dukshëm të gjendjes në trafik.
Policia ka bërë të ditur se kontrollet do të vazhdojnë edhe në komunat e tjera të rajonit, me fokus të veçantë tek drejtuesit e motoçikletave.
Në fund, Policia e Kosovës ka apeluar ndaj të gjithë pjesëmarrësve në trafik që të respektojnë rregullat, ndërsa motoçiklistëve u ka bërë thirrje të përdorin helmetat mbrojtëse, të posedojnë patentë shoferin përkatëse, të kenë mjetet të regjistruara dhe të drejtojnë në mënyrë të sigurt.
Sipas policisë, këto masa synojnë rritjen e sigurisë për jetën dhe pronën e qytetarëve, si dhe krijimin e një ambienti më të rregullt në komunikacion.
