Xhiroja e 31-të e Superligës së Kosovës në futboll, do të mbyllet të enjten, ditë kjo në të cilën do të zhvillohen dy ndeshje.
Në Skenderaj dhe Ferizaj, do të luhen përballjet interesante dhe të forta, të cilat do të startojnë nga ora 15:00.
Drenica e pret në shtëpi Ballkanin, ndërsa Dukagjini luan në udhëtim kundër skuadrës së Ferizajt.
Skuadra e Drenicës ka treguar formë të mirë në javët e fundit dhe ndaj Ballkanit synon fitoren e katërt rresht pasi në pesë ndeshjet e fundit nuk di për humbje.
Ka 38 pikë në tabelë, 14 më pak se Ballkani që renditet i dyti dhe në pesë xhirot e fundit në Superligë ka regjistruar dy fitore, dy humbje dhe një barazim.
Ndërkohë, ndeshja Ferizaj – Dukagjini, do të jetë finale para finales të Kupës së Kosovës pasi këto dy skuadra muajin e ardhshëm do të përballen në Prishtinë për trofeun e Kupës.
Ferizaj në katër xhirot e fundit nuk di për fitore dhe ka 33 pikë në tabelë, pesë më pak se Dukagjini që gjithashtu po lufton për të siguruar mbijetesën në Superligë.
