Kryeministri i Kosovës, Albin Kurti, ka deklaruar se Lëvizja Vetëvendosje nuk ka kundërshtime ndaj asnjë kandidati të propozuar nga Lidhja Demokratike e Kosovës (LDK) për president, përfshirë edhe Vjosa Osmanin, nëse plotësohen kushtet e nevojshme procedurale.
Në një konferencë për media, Kurti ka thënë se LDK duhet të sjellë 15 nënshkrime dhe emrin e kandidatit për president, të shoqëruar me datën e sotme.
“Do ta pranonim. Vetëm le të na i sjellin nënshkrimet. Ne nuk kemi problem me asnjë kandidat që sjell LDK-ja, vetëm le të na i sjellin 15 nënshkrime, edhe 14 apo 13, me datën e sotme dhe emrin e kandidatit. Mandej kur të vijnë, ne i plotësojmë çka u mungon”, ka deklaruar ai.
Megjithatë, Kurti nuk ka garantuar asnjë votë nga grupi i tij parlamentar për kandidatin e LDK-së.
“Në kuti votimi është e fshehtë. Ne do të ulemi prapë dhe do të bisedojmë. Unë nuk mund ta di si votojnë”, ka thënë Kurti./teve1.info/
