Pas shpalljes së aktgjykimit ndaj tre të dënuarve për sulmin terrorist në Banjskë, ka reaguar prokurori special i rastit, Naim Abazi.
Ai vlerësoi se vendimi i sotëm përbën një hap të rëndësishëm drejt vendosjes së drejtësisë, duke theksuar se të gjithë të përfshirët në këtë sulm do të përballen me pasojat ligjore.
Sipas Abazit, institucionet e drejtësisë do të vazhdojnë përpjekjet për të siguruar që edhe personat që ndodhen në arrati të sillen para drejtësisë, përmes mekanizmave të bashkëpunimit ndërkombëtar.
“Përmes ndihmës ndërkombëtare dhe Interpolit do të kërkojmë arrestimin edhe të pjesëtarëve të tjerë. Të gjithë ata që kanë urdhëruar, financuar dhe koordinuar sulmin do të përgjigjen para organeve të drejtësisë”, ka deklaruar ai.
Ndërkohë, Gjykata Themelore në Prishtinë ka dënuar me burgim të përjetshëm Bllagoje Spasojeviq dhe Vlladimir Toliq, ndërsa Dushan Maksimoviq është dënuar me 30 vite burgim për sulmin e vitit 2023.
Nga ky sulm mbeti i vrarë rreshteri i Policisë së Kosovës, Afrim Bunjaku, ndërsa dy zyrtarë të tjerë policorë u plagosën./teve1.info/
