Ilir Kulla, i ftuar në emisionin “Matrix” te Mehmet Kalisi, ka komentuar zhvillimet e fundit politike në Kosovë, duke u ndalur te procesi për zgjedhjen e presidentit.
Ai ka kritikuar ashpër partitë politike, duke i krahasuar me sjellje të papjekura.
“Këta janë fiks në moshën e adoleshencës, kështu po sillen edhe këta. Kjo është kthyer në një ‘parcolet’ të adoleshencës të disa njerëzve që janë për t’u mandatuar me përgjegjësi, dhe e vetmja gjë që nuk bëjnë është marrja e përgjegjësisë”, ka thënë Kulla.
Sipas tij, në mesin e partive opozitare, i vetmi që po mban një qëndrim të qartë është Ramush Haradinaj.
“I vetmi sot në opozitë më serioz, që ka një qëndrim të vetin të qartë, është Ramush Haradinaj. Po të isha në vend të Lumir Abdixhiku dhe kryetarit të PDK-së, Bedri Hamza, do të merrja një listë me firma dhe do t’ia dërgoja kryeministrit në zyrë, duke i thënë: ky është kandidati ynë – nëse do, pranoje”, është shprehur ai.
Kulla ka shtuar se në rast se opozita nuk arrin të propozojë një emër, atëherë duhet t’ia lërë këtë çështje në dorë kryeministrit Albin Kurti dhe të mos bllokojë situatën.
“Nëse nuk kanë një emër, le t’ia lënë në dorë kryeministrit dhe të mos e bllokojnë situatën. Ose të marrin vendim të qartë dhe të thonë se vendi duhet të shkojë në zgjedhje”, ka deklaruar ai.
Ai gjithashtu ka theksuar se situata aktuale globale dhe problemet ekonomike në vend kërkojnë më shumë përgjegjësi nga klasa politike.
“Në kohën kur ka luftë në Ukrainë dhe tensione në Lindjen e Mesme, kur edhe çmimet pritet të rriten, qytetarët kanë shqetësime reale si ekonomia, energjia elektrike, nafta dhe bujqësia. Kosova nuk e ka luksin për bllokada të tilla politike”, ka përfunduar Kulla.
