Këshilli Drejtues i Partisë Demokratike të Kosovës (PDK) ka mbajtur sot mbledhjen e radhës, në të cilën janë diskutuar zhvillimet e fundit politike në vend, procesi në Dhomat e Specializuara në Hagë, si dhe çështja e zgjedhjes së Presidentit të Republikës së Kosovës.
Në një njoftim zyrtar, PDK ka riafirmuar përkushtimin e saj për mbrojtjen e rendit kushtetues, stabilitetit institucional dhe funksionimit demokratik të shtetit, duke e cilësuar veten si subjekt politik shtetformues dhe shtetndërtues.
Partia ka vlerësuar se vendi po përballet me kriza të njëpasnjëshme politike dhe institucionale, për të cilat fajëson shumicën parlamentare.
Sipas PDK-së, bllokadat e vazhdueshme dhe mungesa e përgjegjësisë shtetërore po pengojnë funksionimin normal të institucioneve dhe po dëmtojnë interesin qytetar.
PDK ka theksuar se Kosova nuk duhet të mbahet peng i interesave të ngushta partiake dhe kalkulimeve politike, duke paralajmëruar se vazhdimi i kësaj gjendjeje është i rrezikshëm për demokracinë dhe institucionet e vendit.
Sa i përket zgjedhjes së Presidentit, PDK ka deklaruar se ka qenë e gatshme të kontribuojë në zhbllokimin e situatës përmes mbështetjes së një kandidati konsensual, pa kushte për përfshirje në qeveri.
Megjithatë, sipas saj, mungesa e vullnetit politik nga ana e pushtetit aktual ka pamundësuar arritjen e një marrëveshjeje, duke e konsideruar kështu të përfunduar kontributin e saj në këtë proces.
Në lidhje me procesin gjyqësor në Hagë, PDK ka kërkuar që vendimi përfundimtar të jetë i drejtë dhe i bazuar vetëm në fakte dhe prova, pa ndikime politike.
“PDK riafirmon bindjen e saj të palëkundur në pafajësinë e liderëve të UÇK-së dhe në pastërtinë e luftës çlirimtare”, thuhet në njoftim.
PDK gjithashtu ka ritheksuar orientimin euroatlantik, duke kërkuar forcimin e partneritetit strategjik me aleatët ndërkombëtarë si garanci për stabilitet dhe siguri.
Në aspektin ekonomik, partia ka vlerësuar se gjendja është përkeqësuar, ndërsa qytetarët po përballen me rritje të kostos së jetesës.
“Për këtë arsye, kërkohen masa urgjente, konkrete dhe efektive për mbështetje ekonomike dhe lehtësim të barrës financiare për qytetarët”, theksohet në njoftim.
Në fund, Këshilli Drejtues ka bërë të ditur se zgjedhjet e brendshme partiake pritet të mbahen gjatë vitit 2026, me synim forcimin e demokracisë së brendshme dhe ndërtimin e një alternative të re qeverisëse.
PDK ka theksuar se do të vazhdojë të jetë një faktor stabiliteti dhe një alternativë serioze për qeverisjen e vendit./teve1.info/
