Brenda kësaj banese, mesditën e së enjtes ndodhi një ngjarje e rëndë.
Një zjarr që e kaploi këtë njësi banimi, i mori jetën babait dhe dy fëmijëve të tij.
E gjithë ngjarja ndodhi në lagjen “Mirditë” të Malishevës.
Në kohën kur ndodhi ngjarja tragjike, brenda banesës ndodhej vetëm babai me dy fëmijët, njëri 9 e tjetri 12 vjeç.
Ndërsa dy fëmijët e tjerë të kësaj familje, në kohën e tragjedisë ndodheshin në shkollë.
Më të marrë lajmin, në vendngjarje dolën organet e rendit.
Për këtë menjëherë u vendosën edhe shiritat e sigurisë.
E gjatë gjithë kohës këtu po qëndronin edhe familjarët.
Sipas tyre, autoambulanca u vonua.
Kjo i shtyri që dy fëmijët t’i dërgojnë vet me urgjencë në Qendrën e Mjekësisë Familjare.
“Kur provova t’ua prek pulsin, nuk pashë shenja jete dhe kanë shku shpejt. I kam çu në ambulantë për me i këqyr se si janë, por nuk munda as me i puth për herë të fundit. Shumë më kanë dhimtë. E kam djalë të dajës këtë djalin, edhe fëmijët i kam pas si fëmijë të mi. Në gjendje shumë të keqe jam. Dy të kanë qenë të kalltë e të vdekur në vend. Jam mundu me i shti në kerr vetë, por nuk mujsha”, tha Florentina Bytyqi-familjare.
E më të arritur në vendngjarje, Policia e Kosovës e konfirmon se në banesë ndodhej vetëm babai.
“Ne si polici në ora 12:55 minuta kemi pranuar një informatë për një banesë në banimin kolektiv social që është duke u djegur, kemi njoftuar njësinë emergjente dhe të zjarrfikësve që t’u ofrojmë ndihmë. Në vendin e ngjarjes emergjenca shëndetësore e kanë hasur aty një person pa vetëdije dhe menjëherë është dërguar në QKMF, ndërsa fëmijët nga një banor”, ka thënë Nazmi Zogaj- komandant i Policisë në Malishevë.
Se viktimat janë dërguar pa shenja jetë në QKMF-në e Malishevës e thotë edhe prokuroria.
Këta shtojnë se po hetohen shkaqet që çuan në këtë tragjedi.
