Në kazermën Lidhja e Prizrenit në Prizren është mbajtur ceremonia e përfundimit të trajnimit EOD Niveli 3 për pjesëtarët ukrainas, i realizuar në bashkëpunim me EUCOM.
FSK përmes një njoftimi ka bërë të ditur se trajnimi, i cili zgjati gjashtë javë, u fokusua në ngritjen e kapaciteteve profesionale të pjesëtarëve në fushën e menaxhimit të rreziqeve shpërthyese dhe udhëheqjes së ekipeve EOD. Programi u zhvillua nga instruktorët e Forca e Sigurisë së Kosovës në bashkëpunim me instruktorë amerikanë.
Ky është grupi i shtatë i pjesëtarëve ukrainas që përfundon këtë trajnim në Kosovë, duke e çuar në 146 numrin e përgjithshëm të pjesëmarrësve nga Garda Kombëtare, Policia dhe Shërbimet Emergjente të Ukrainës që kanë përfituar nga ky program.
“Në emër të Ministrisë së Mbrojtjes, Kolonel Ahmet Ajeti përgëzoi kursantët për përfundimin me sukses të trajnimit, duke theksuar rëndësinë e bashkëpunimit me aleatët perëndimorë për përballimin e sfidave të sigurisë. Ndërkohë, në emër të Komandantit të FSK-së, Gjenerallejtënant Bashkim Jashari, Kolonel Astrit Haliti rikonfirmoi përkushtimin e institucionit për të mbështetur partnerët ndërkombëtarë në çdo kohë”, thuhet në njoftim.
EUCOM është përfaqësuar nga Jose Colon dhe Kolonel David Veeney nga Ambasada Amerikane që kanë falënderuar FSK për mbështetjen.
