Çerekfinalja tjetër që luhet sot në mbrëmje në kuadër të Ligës së Kampionëve, është ajo ndërmjet Sportingut të Lisbonës dhe Arsenalit.
Ndeshja që nis në orën 21:00, luhet në Lisbonë dhe Arsenali vlerësohet favorit përballë ekipit nga Portugalia.
Krahas Premier Leagues, Arsenali këtë sezon ka treguar paraqitje të mira në Champions, të cilat trajneri Mikel Arteta pret të vazhdojnë edhe kundër Sportingut.
Londinezët prijnë në kampionatin anglez dhe po marshojnë drejt titullit të kampionit, ndërsa janë eliminuar prej garave në dy kupat e Anglisë.
Sportingu, në anën tjetër është i pamposhtur në shtëpi pasi i ka fituar të gjitha pesë ndeshjet e fundit, por që kundër Arsenalit nuk e ka fituar asnjë prej shtatë përballjeve të mëparshme.
Arsenali i ka fituar 9 nga 10 ndeshjet e fundit në këtë sezon të Championsit dhe synon të marrë një rezultat të favorshëm në Lisbonë, në mënyrë që të jetë më i qetë për ndeshjen e kthimit në Londër, që zhvillohet pas një jave.
