Shtëpia botërore e futbollit, FIFA, vazhdon që në rrjetet sociale të shkruajë për rritjen e madhe të Kosovës. Të mërkurën FIFA e publikoi ranglistën e re të përfaqësueseve, ndërsa të premten ka postuar një fotografi të Fisnik Asllanit dhe Dion Gallapenit.
“Kosova vazhdon të ngjitet”, shkruan në titull, ndërsa në tekst FIFA ka treguar se Kosova e ka regjistruar ngjitjen më të madhe në ranglistë deri tani.
Në katër fotografitë e publikuara ka treguar edhe se si e nisën “Dardanët” rritjen e hovshme.
Në fotografinë e dytë është paraqitur Florent Muslija, ndërsa FIFA ka shkruar se “Kosova ishte e 190-ta në korrik të vitit 2016”, dhe që nga ajo kohë “trajektorja ka qenë në rritje”.
Fotografia e tretë e publikuar është me Kreshnik Hajrizin, dhe paraqitet rekordi i ri i arritur nga Kosova, që tani zë pozitën e 78-të në ranglistë.
“Pavarësisht se nuk u kualifikua për në Kupën e Botës, Kosova është ngjitur në pozitën e 78-të në ranglistën botërore të FIFA-s, që është pozita më e lartë e arritur deri tani”, ka shkruar FIFA.
Dhe krejt në fund, është publikuar fotografia e futbollistëve të Kosovës me dorën në zemër, gjatë intonimit të himnit shtetëror, me Elvis Rexhbeçajn, Albian Hajdarin, Kreshnik Hajrizin, Mërgim Vojvodën, Dion Gallapenin dhe Lumbardh Dellovën.
“Kampanja impresive e Kosovës në kualifikimet e Kupës së Botës e ka ndihmuar që ta arrijë këtë renditje, pasi përfundoi në pozitën e dytë në grupin e vet dhe e mposhti Sllovakinë në gjysmëfinale të plejofit evropian, para se të mposhtej nga Turqia në finale”, e ka mbyllur postimin FIFA.
