Deputetja e Lëvizja Vetëvendosje, Rozeta Hajdari, gjatë seancës së jashtëzakonshme në Kuvendin e Kosovës, deklaroi se Qeveria ka ndërhyrë në mënyrë të duhur për menaxhimin e çmimeve të derivateve të naftës, duke theksuar se masat e ndërmarra kanë qenë të menduara dhe me efekt afatgjatë.
Ajo kritikoi propozimet e opozitës për uljen e përkohshme të TVSH-së dhe akcizës, duke i cilësuar ato si të pamenduara dhe pa mbështetje konkrete financiare.
“Po propozohet pra ulja e përkohshme e TVSH-së ose akcizës, subvencionimi i sektorëve më të ndjeshëm përfshirë bujqësinë dhe prodhimin, si dhe mbështetje për transportin publik dhe më shumë, por pa asnjë plan se si do të kompensohen ato. Le ta themi qartë: kjo mund të tingëllojë mirë për ju në aspektin partiak, ju deputetë të opozitës, por është ekonomikisht e papërgjegjshme dhe politikisht populiste. Këto të hyra publike nuk janë abstrakte. Këto të hyra nga buxheti i shtetit janë paga për mësuesit, për mjekët, investime në infrastrukturë, mbështetje për familjet dhe për bizneset. Pra, pyetja është shumë e thjeshtë: Për rritjen e çmimeve të naftës, i bartur nga inflacioni për shkak të krizave gjeopolitike, a jemi gati t’u themi qytetarëve se do të ulet mbështetja për familjet dhe bizneset dhe do të shkurtohen shërbimet publike për një masë që nuk garanton as ulje reale të çmimeve të produkteve të naftës?”
Sepse le ta sqarojmë edhe këtë: Ne si grup parlamentar i Lëvizjes Vetëvendosje, me qeverisjen tonë, kemi ndërhyrë aty ku duhet. Kemi formalizuar tregun e naftës, kemi eliminuar kostot e panevojshme dhe kemi rritur transparencën. Këto janë masa që japin efekt real dhe afatgjatë“, tha Hajdari.
Deputetja po ashtu jepi kritika ndaj qeverive të kaluara, duke theksuar se ekzekutivi aktual është përballur me pasoja të trashëguara nga keqmenaxhimi dhe korrupsioni në sektorë të ndryshëm ekonomikë.
Sipas saj, për vite me radhë kanë ekzistuar praktika të dëmshme dhe ndikime të grupeve të interesit që kanë penguar zhvillimin e tregut të lirë dhe konkurrencën e ndershme.
Hajdari shtoi se gjatë viteve të fundit janë ndërmarrë hapa konkretë për të luftuar këto dukuri dhe për të krijuar një ambient më të barabartë për bizneset, duke përmendur si shembull sektorin e naftës, i cili sipas saj ka qenë i pa rregulluar për më shumë se një dekadë për shkak të interesave monopoliste.
