Ministria e Industrisë, Ndërmarrësisë, Tregtisë dhe Inovacionit ka njoftuar se procesi i verifikimit të njehsorëve elektrikë në Kosovë po vazhdon me intensitet të shtuar, pas themelimit të një komisioni ad hoc për shqyrtimin e ankesave të konsumatorëve.
Sipas ministrisë, ky komision është krijuar për të verifikuar njehsorët e qytetarëve që kanë paraqitur ankesa në Departamenti për Mbrojtjen e Konsumatorit. Verifikimet e para laboratorike janë realizuar në Agjencia e Metrologjisë së Kosovës, ku janë identifikuar disa çështje teknike.
Të gjeturat e raportit thonë se njehsorët kanë qenë me afat të skaduar, devijime në datë prej 2-3 ditësh me kohën reale si dhe devijime rreth 10-11 orë në kohën reale.
“Është vërtetuar se njehsorët kanë qenë me afat të skaduar të vlefshmërisë; Janë evidentuar devijime në datë prej rreth 2–3 ditësh krahasuar me kohën reale; Gjithashtu është konstatuar se ekzistojnë devijime prej rreth 10–11 orësh krahasuar me kohën reale; Matja e energjisë elektrike ka rezultuar të jetë në rregull dhe pa ndikim në saktësinë e konsumit të regjistruar; Është konstatuar se bllombat kanë qenë të paprekura dhe pa dëmtime”, thuhet në komunikatë.
Ministria ka bërë të ditur se pas finalizimit të raportit përfundimtar, do t’i drejtohet Zyra e Rregullatorit për Energji për ndërmarrjen e hapave të mëtejshëm në përputhje me gjetjet.
Ndërkohë, bazuar në Ligjin nr. 06/L-037, Inspektorati Qendror i Mbikëqyrjes së Tregut pritet të vendosë masa ndëshkuese ndaj KEDS për rastet që lidhen me skadimin e afatit të vlefshmërisë së njehsorëve.
Sa i përket ankesave, ministria ka bërë të ditur se deri më 30 mars 2026 nuk ishte regjistruar asnjë ankesë, ndërsa pas themelimit të komisionit, vetëm në dy ditët e fundit janë pranuar 209 ankesa, të cilat tashmë janë në proces verifikimi.
“MINTI mbetet e përkushtuar të trajtojë çdo ankesë të konsumatorit, të bazuar në fakte, dhe në përputhje me gjetjet e verifikimit do të ndërmarrë masa ligjore.”
Në fund, qytetarët janë ftuar që të paraqesin ankesat e tyre përmes emailit zyrtar, duke përfshirë të dhënat e kontaktit për një trajtim sa më efikas të rasteve./teve1.info/
