Eksperti i çështjeve të sigurisë, Ilir Kulla, në emisionin “Matrix” në Tëvë1, ku ishte i ftuar së bashku me Mehmet Kalisin, ka folur për rolin e Kinës dhe Rusisë në konfliktin aktual në Lindjen e Mesme.
Sipas Kullës, Kina dhe Rusia janë aleatë të Iranit dhe po përfitojnë nga kjo situatë, veçanërisht Rusia në aspektin ekonomik.
“Kina dhe Rusia janë dy aleatë të Iranit dhe janë dy vende që po përfitojnë nga kjo luftë. Në mënyrë të veçantë, Rusia është duke përfituar – vetëm gjatë këtij muaji të luftës ka fituar rreth 100 miliardë euro më shumë nga sa ishte parashikuar”, ka thënë Kulla.
Ai ka folur edhe për zhvillimet e mundshme të mëtejshme të konfliktit, duke shprehur shqetësim për vazhdimin e tij.
“Unë mendoj se do të kemi vazhdimin e luftës. Uroj që të mos kem të drejtë, sikurse kam shpresuar edhe më parë, por kam frikë se edhe kësaj radhe do të dal i saktë”, është shprehur ai.
Sipas Kullës, situata mbetet e paqëndrueshme dhe ekziston rreziku që konflikti të zgjasë më shumë sesa pritej.
