Tahiri ka thënë se AAK-ja e sheh me shqetësim të madh qasjen injoruese të BE-së ndaj Kosovës.
“Kushtet e parapara nga Komisioni Evropian janë përmbushur vite më parë. Si grup parlamentar i kemi dy pyetje për anëtarët e BE-së, a është kjo një politikë sanksionuese që po i bëhet Kosovës apo Kosova është peng i politikës së anëtarëve të unionit evropian”, ka thënë ai.
Tahiri e ka komentuar edhe vizitën e emisarit, Miroslav Lajçak, teksa shtoi se ai nuk mjafton vetëm të ndihet keq por duhet të veprohet sa i përket liberalizimit të vizave, shkruan teve1.info
“Sot në vizitë do ta kemi edhe emisarin Lajçak. Pyetja shtrohet se çfarë do tu thotë ai zyrtarëve të Qeverisë dhe partive parlamentare për këtë temë. Nuk mjafton vetëm të ndihet keq që s’po ndodh por duhet të veprohet në këtë çështje”, tha Tahiri.
Tahiri theksoi se është shqetësuese mosreagimi i Qeverisë së Kosovës karshi kësaj teme, duke shtuar se sa ishin ata në opozit kanë kritikuar e sulmuar për këtë temë.
“Shohim mosreagim të Qeverisë ndaj kësaj teme. Mungesa e kundërshtimit nga Qeveria në raport me këtë temë është e habitshme, sa ishin në opozitë gjithmonë kanë kritikuar e sulmuar për këtë temë. Shihet që lobimi rus përmes Beogradit po ka ndikim”, ka thënë Tahiri.
Tahiri ka shtuar se do të iniciojnë një debat parlamentar dhe një rezolutë në mënyrë që këtë çështje ta adresojmë në nivelin më të lartë.
“Aleanca për Ardhmërinë e Kosovës do të iniciojë një debat parlamentar, një rezolutë në mënyrë që të adresojmë këtë çështje në nivelin më të lartë nga Parlamenti i Kosovës”, ka shtuar Tahiri.
