Ministri i Punëve të Brendshme, Xhelal Sveçla, ka pritur sot në takim Komisionerin e Lartë të OSBE-së për Minoritetet, Christophe Kamp, të cilin e falënderoi për vizitën dhe për mbështetjen e vazhdueshme që OSBE ka ofruar në fuqizimin e kapaciteteve institucionale të Ministrisë së Punëve të Brendshme.
Gjatë takimit, palët diskutuan për angazhimet e Ministrisë në zbatimin e Ligjit për të Huaj, si dhe për hapat e mëtejmë drejt integrimit të sektorëve të shëndetësisë dhe arsimit në pjesën veriore të Republikës së Kosovës, në përputhje me kornizën ligjore të vendit.
Ministri Sveçla e informoi Komisionerin Kamp edhe për përpjekjet e vazhdueshme të Ministrisë për rritjen e përfshirjes së komuniteteve në institucionet shtetërore dhe për ofrimin e shërbimeve më gjithëpërfshirëse për ta.
Me këtë rast, Sveçla rikonfirmoi përkushtimin e Ministrisë së Punëve të Brendshme për respektimin dhe garantimin e të drejtave të komuniteteve, si dhe angazhimin e institucioneve relevante për ruajtjen e një ambienti të qetë dhe të sigurt për të gjithë qytetarët.
