Specialistët e sigurisë së eksplozivëve të NATO-s nën koordinimin e Inxhinierëve të Përbashkët të Shtabit të KFOR-it zhvilluan një inspektim të përbashkët të sigurisë dhe mbrojtjes në minierën e Trepçës.
Sipas KFOR-it, inspektimi është kryer së bashku me inspektorët e armëve dhe municionit nga Departamenti për Siguri Publike i Ministrisë së Punëve të Brendshme (MoIA) dhe inspektorët e eksplozivëve minierorë nga Komisioni i Pavarur për Miniera dhe Minerale.
Ky aktivitet i rregullt thuhet se, reflekton angazhimin e vazhdueshëm të KFOR-it për të punuar ngushtë me institucionet vendore, duke forcuar partneritetet dhe duke kontribuar në krijimin e një mjedisi të sigurt për të gjithë banorët e Kosovës.
“KFOR vazhdon të zbatojë mandatin e saj, të bazuar në Rezolutën 1244 të Këshillit të Sigurimit të OKB-së (1999), për të siguruar lirinë e lëvizjes dhe një ambient të sigurt për të gjithë qytetarët, në mënyrë të paanshme. Forca punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX), në rolet e tyre si përgjegjës të sigurisë”, theksohet në njoftim.
