Asociacioni i Komunave të Kosovës (AKK) ka bërë të ditur se dëmet e shkaktuara nga vërshimet e fundit në disa komuna të vendit tashmë tejkalojnë shumën prej 5 milionë eurosh.
Sipas vlerësimeve fillestare, dëmet kanë prekur rëndë ekonomitë familjare, bizneset lokale si dhe infrastrukturën publike në zonat e goditura.
Ndër komunat më të prekura, sipas AKK-së, renditen Gjakova me rreth 2.7 milionë euro dëme, Drenasi me mbi 1.5 milionë euro, ndërsa Peja, Rahoveci dhe Mitrovica me nga rreth 800 mijë euro secila. Po ashtu, dëme të konsiderueshme janë raportuar edhe në Klinë dhe Malishevë.
Nga Asociacioni bëhet e ditur se vlerësimet ende nuk janë përfundimtare në disa komuna të tjera, ndërsa situata mbetet në monitorim.
Në këtë situatë, AKK i ka bërë thirrje nivelit qendror për reagim të shpejtë institucional, sigurimin e fondeve emergjente dhe mbështetje konkrete për sanimin e dëmeve.
Po ashtu, theksohet nevoja për masa parandaluese, në mënyrë që të shmangen përsëritje të situatave të ngjashme në të ardhmen.
Sipas AKK-së, komunat nuk mund ta përballojnë të vetme këtë barrë financiare, ndaj kërkohet koordinim dhe ndërhyrje e menjëhershme nga institucionet qendrore për rikthimin e normalitetit dhe vazhdimin e shërbimeve për qytetarët.
